الرئيسية / مقالات / استثمار إنتحار حمار… أ.د.ضياء واجد المهندس

استثمار إنتحار حمار… أ.د.ضياء واجد المهندس

منبر العراق الحر :

عتيوي مربّي مطي، صحى الصبح لكَه المطي ميت ! .. جابله بيطرى حتى يعرف سبب الوفاة كٍَاله.. حمارك مات بالجلطة، دار وجهه عالمطي، ولزم أذاناته، وكَام يحاچيه،بحركَة: ـ
جتك جلطه ليش؟ .. خريج هندسة وملاكَي شغل ؟ .. خريج إدارة وإقتصاد وواكَف بسوك المخضــــــر ؟..خريج آداب وتشتغل تكسي ؟ ..خريج قانون وتشتغل دلال ؟..جمعت كل إللي تملكه، ونطيته لإبنك علمود يسافر لأوروبـا، وغرك على شواطئ اليونان ؟! ..مديون وماعندك تسدد ديونك ؟ ..تنتظر التعيين،وصارلك عشر سنوات؟ .. والزماله إللي عاجبتكك وتريدك تتزوجها وماكَادر تخطبها ؟ ..رحت ترقًم الكيا.. ولكَيت عليها مخالفات وانت ماخذها من الشركة ؟ .. مكَادر تشتري ملابس لجهالك ؟.. ملاكَي بيت ؟… منين جتك الجلطـــــــــه ؟..متداين ومتورط وماعندك تسدد ؟..جتك قائمة كهرباء ٣ ملايين، وما كَادر تدفعها وكَطعوا عنك الكهرباء ؟ وفوكَاها أبو المولدة سالك أهل أهلك ؟..حاس نفسك غريب بالعراق ؟.. الدنيا مخربطه داير مدايرك؟.. ومخك مكَام يتحمل من المحاصصة كثرة القوانين المتخالفة والجائرة ؟.. هاي اذا أكو قوانين بالاصل ؟ .. غلاء اﻻسعار ماعاجبك ؟..
دتحس أكو ثروات بالبلد وانت مامستفيد منها ؟..منين جتك الجلطة داده ؟ ..من النواب الكذابين إللي بدم الشعب متاجرين، لو من المسعولين الحرامية؟ ..
لو اﻻعلام الرخيص الفاسد ؟ ..منين جتك الجلطة حبيبي ؟ ..أخاف على التقاعد اللي مايكفي إيجار البيت ؟ ..إجاك فشل كلــــــوى من المي الملوث، ورحت تغسل كليتك وماكو مكان و المستشفى فضائي، وإنتظرت الى ان واحد يموت وتدخل بمكانه ؟..جتك الجلطة منـــين ؟؟؟؟؟؟!..
مشتهي لحم ولكَيت الكيلو 15 الف ؟ ..جيت تشترى دجاج ولكَيته من كثر ما مجمد صاير چنه نعال لاستيك ؟ .. رحـــت تجيب الحصه.. وكَالولك ماكو غير الطحين المعفن ؟ .. وين لكَتك الجلطة خويه ؟ .. قنينة الغاز ب 7 الاف دينـــــــــار ؟ .. لو قائمة الماي بربع مليون ؟ ..حاط خط نت بخمسين الف، والنت ما يجي أصلاً ؟ .. جتك الجلطه ليش ؟ إخوانك مايزورنك ؟ … وحده چنت تحبها، وسوتلك بلوك ع الفيس لأن لكَت زمال غـــــيرك ؟ ..نص كرايبك بالسجن ؟. گاولك التعليم تافه ؟ .. لو القضاء فاسد ؟ ..جاوبني ليش انجلطت يمعود ؟ ، سمعوگ
الشعب جاهـل ؟ ..لو المفتى أرهابي ؟ ..لو شيخ الجامع فاسق ؟ .. منين جتك الجلطة كَليبي ؟
كَوللي، يعني تريد تكَولي إنتة تحس أكثر مني ؟؟؟؟ ! جـــــــاوب رحمه لاهلك المطايا .. ؟.
مر (عموري ابو درب ) وگال لصاحب المطي ، راح اخذ المطي قبل ماتشوفك الشرطة، وتگول انت گتلته ويذبوك بالسجن ،وياخذون منك ( المالات) حتى يفگون ياخه منك ، ويجيك موظف الامانة و ياخذ منك غرامة لان ما دافنه بمدفن شرعي ، وبعدين اذا شافه ابو الصحة هم ياخذ منك القاسمه الله، لانك ممطلع شهادة وفاة للمطي ،ويجوز يشرحوه خاف انت مسممه، واذا اجاگ ابو البيئة وشافه يبليك بتلوث البيئة ،واذا درى ابو الزراعة يرفع عليك دعوة تدمير الثروة الحيوانية .ابو المطي گال لعموري اخذه وخلصني منه …
عموري راح للسوك وگال ياهو يريد يربح مطي اصيل، يدفع دينار ويشترك بمسابقة ( من يربح المطي ) ، والتمت الناس وجمع عموري ٥٠٠ دينار وسوو القرعة و فاز بالقرعة معيدي والعالم تبارك لمعيدي على ربحه مطي بدينار…عموري ابو درب اخذ معيدي وگله تعال استلم مطيگ ..ولمن وصلوا البيت ، شاف معيدي المطي فطيسة ، گال لعموري : المطي ميت ..
عموري جوابه : محسود معيدي محسود ، اخذ مطيك وروح…ادفنه ، اذبحه وبيعه، وگول لحم هندي لو حنطه وخليه بالمتحف، وگول هذا زمال ابو قتيبة الكركواني أثناء فتحه پاب الدنمبك ،في العصر الجنجلوقي..
يا جماعة ..تره مطي معيدي ميت…
لنا وللعراق ولمعيدي الحي القيوم الذي لاتاخذه سنة او نوم ..
أ.د.ضياء واجد المهندس
مجلس الخبراء العراقي

شاهد أيضاً

سلام خذ للغة الضاد…. علي علي

منبر العراق الحر : قد يظن قارئ التالي من السطور أنها درس في اللغة العربية، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.